Рөстәм Миңнеханов «КАМАЗ» коллективына «Фидакарь хезмәт өчен» орденын тапшырды
Күренекле хезмәтләре өчен һәм компаниягә нигез салынуга 55 ел тулу уңаеннан «КАМАЗ» предприятиесе коллективы «Фидакарь хезмәт өчен» ордены белән бүләкләнде. Бүләкләү турындагы указны Россия Президенты Владимир Путин имзалаган. Әлеге бүләкне бәйрәм чарасы кысаларында Татарстан Республикасы Рәисе Рөстәм Миңнеханов «КАМАЗ» генераль директоры Сергей Когогинга тапшырды.
«Бу бүләк – безнең өчен зур дәрәҗә, масштаблы сәяси, икътисади һәм хәрби таләпләр булганда эшчеләрнең хезмәтенә югары бәя. «КАМАЗ» туган ил мәнфәгатьләре сагында тора», – диде Сергей Когогин.
Оешма җитәкчесе сүзләренчә, бүген коллективның бөтен тырышлыгы ил чикләрен саклау өчен продукция җитештерүгә юнәлтелгән. Шулай ук импортны алыштыру һәм үзебезнең илдә җитештерүне җайга салу шартларында яңа компонентлар базасында коммерцияле КАМАЗ автотехникасының күп төрләрен чыгару мөһим.
«Бу безнең Россиянең технологик суверенитетын ныгытуга керткән өлешебез. Мин хезмәттәшләремә мөһим дәүләт бурычларын үтәгәндә күрсәткән фидакарьлекләре, җаваплылыклары һәм ватанпәрвәрлекләре өчен рәхмәтлемен һәм компания коллективын югары бүләк белән котлыйм», – диде автогигант башлыгы.
Искәртеп үтик, әлеге орден Россиянең икътисади, фәнни һәм оборона потенциалын ныгытуга һәм үстерүгә керткән күренекле хезмәтләр өчен тапшырыла.