Рөстәм Миңнеханов һәм Минтимер Шәймиев «Теләкләр чыршысы» акциясендә катнашты
Татарстан Президенты Рөстәм Миңнеханов «Теләкләр чыршысы» проектында катнашты. Бу хакта ул үзенең телеграм-каналында хәбәр итте. Искәртеп узабыз, хәйрия акциясе ел саен үткәрелә, аның ярдәмендә авыр тормыш хәлендә калган балаларның Яңа ел теләкләре чынга аша.
«Ел саен балалардан бик күп хатлар килә, аларның хыялларын чынга ашырырга тырышабыз! Акциягә сез дә кушылыгыз, Яңа елга кадәр вакыт бар әле», - дип язган республика Президенты.
Моннан тыш, акциядә Татарстанның беренче Президенты, ТР Дәүләт Киңәшчесе Минтимер Шәймиев тә катнашты. «ТР муниципаль берәмлекләр советы» Ассоциациясенең XVII съезды башланыр алдыннан ул Яңа ел чыршысыннан 9 яшьлек Зифа Вәлиева (ул Казанда Президент чыршысында катнашырга хыяллана) һәм 13 яшьлек Азалия Мортазинаның (ул кинолог ролендә чыгыш ясарга тели) открыткасын алды.
Дәүләт Киңәшчесе акцияне оештыручылар һәм анда катнашучыларга рәхмәт белдерде, кызларның хыялы тиздән чынга ашачагын әйтте.