Рөстәм Миңнеханов: «ЭНЕРГОПРОМ» форумы гомумфедераль әһәмияткә ия булачак
Бүген Казанда башланган «ЭНЕРГОПРОМ» Татарстан халыкара форумы гомумфедераль әһәмияткә ия булачак. ТР Рәисе Рөстәм Миңнеханов форумның пленар утырышында шулай дип белдерде.
«Сезне куандыра һәм үзем дә сезнең белән бергә шатлана алам: без бу форумның гомумфедераль әһәмияткә ия булачагы турында килештек. Уртак оештыру комитеты төзеләчәк, аны безнең министр җитәкләячәк, без ярдәм итәчәкбез. Һәм, әлбәттә, бүгенге көндә мондый мәйданчык Россия өчен бик кирәк дип уйлыйм», – диде Миңнеханов залда утыручыларга.
Пленар утырыш «Яңа энергетика технологияләре һәм технологик лидерлык: тенденцияләр һәм сынаулар» дигән темага багышланган. Анда Россия энергетика министры Сергей Цивилев та катнаша.
Иртән Миңнеханов һәм Цивилев «ЭНЕРГОПРОМ»ның бер өлеше булган «KazanEnergyExpo» күргәзмәсе белән танышты.