Рөстәм Миңнеханов Апас районында урып-җыю кампаниясе барышын бәяләде
Татарстан Президенты Рөстәм Миңнеханов эш визиты белән Апас районында булды. Бу чарада Татарстан Республикасы Авыл хуҗалыгы һәм азык-төлек министры катнашты, дип хәбәр итә республика башлыгының матбугат хезмәте.
Рөстәм Миңнеханов комбайнчылар, хуҗалык җитәкчеләре, авыл җирлекләре башлыклары һәм инвесторлар белән очрашты.
Фото: © ТР Президенты матбугат хезмәте
Район башлыгы Равил Хисаметдинов хәбәр иткәнчә, урып-җыю эшләренең гомуми күләме 70 660 га тәшкил итә, эшләр 24,5% мәйданда тәмамланган. Кырларда хәзер 88 комбайн эшли, уртача гектардан 35,6 центнер уңыш җыялар.
Президент терлекчелек буенча эшне көчәйтергә кирәклегенә игътибар итте, әлегә күрсәткечләр районның потенциалына туры килми.
«Бөтен проблема – азык белән тәэмин итү. Азык булса, хуҗалыкта сыер тотарга теләүчеләр күбрәк булачак», - диде ул.
Шулай ук Татарстан Президенты Ибраһимов крестьян-фермер хуҗалыгының сөт-товар фермасында да булды. Фермада 14 кеше эшли. Президентка җитештерүне киңәйтү планнары турында сөйләделәр.