Россиянең иң борынгы фәнни-популяр журналларының берсе махсус санын Татарстанга багышлады
Россиянең иң борынгы фәнни-популяр журналларының берсе булган «Природа» журналының чираттагы саны беренче тапкыр тулысынча илнең бер төбәгенә — Татарстан Республикасына багышланган. Татарстан Фәннәр академиясендә хәбәр итүләренчә, номерда ТР башкаласы Казанга аерым игътибар бирелгән.
Махсус санга алдынгы галимнәрнең Татарстан табигате, фәнни потенциалы һәм үзенчәлекләре турындагы материаллары кергән. Укучылар республиканың табигый ландшафтларының байлыгы, Идел-Чулман тыюлыгы тарихы, Казандагы кошлар турындагы тикшеренүләр, «Зәңгәр күл» аерым сакланучы табигый территориясенең үсеше, шулай ук Татарстанның нефть чыгару эшчәнлеге һәм битум ятмаларын өйрәнүнең заманча ысуллары турында белә алачак.
Казан Россиянең иң зур фәнни үзәкләренең берсе буларак карала. «Природа» журналы тарихындагы беренче төбәк саны Татарстанның үзенчәлекле энциклопедиясе булырга тиеш. Аның мәкаләләре укучыларны республиканың табигый байлыгы, галимнәрнең казанышлары һәм төбәктә алып барыла торган заманча тикшеренүләр белән таныштырачак.