Математика, рус теле һәм әдәбияты укытучыларына ихтыяҗ зур. Бу турыда Хезмәт һәм мәшгульлек буенча федераль хезмәтнең матбугат хезмәте «Работа России» порталы мәгълүматларына сылтама белән хәбәр итә. РИА Новости шул хакта хәбәр итә.
«Укытучылар арасында математика, рус теле һәм әдәбияты укытучылары, шулай ук чит тел укытучылары иң кирәклеләр рәтендә тора. Әлеге һөнәр белгечләре өчен бөтен ил буйлап 37 меңнән артык тәкъдим бар», диелә хәбәрдә.
Математика укытучылары өчен порталда өч меңнән артык вакансия бар, рус теле һәм әдәбияты укытучылары өчен 2,5 меңнән артык, шулай ук эш бирүчеләр чит тел (1,7 мең тәкъдим), физика (1,3 мең), информатика (якынча 900 эш урыны), химия һәм тарих укытучыларын (якынча 600 вакансия) эзли, дип өстәделәр федераль хезмәттә.
Моннан тыш, Россия мәгариф учреждениеләренә методистлар, логопедлар, дефектологлар һәм башка белгечләр таләп ителә.
Билгеләп үтелгәнчә, кайбер эш бирүчеләр башка төбәкләрдән кандидатларга күченгәндә ярдәм күрсәтергә, аерым алганда, торак, тулы социаль пакет белән тәэмин итү яки башка өстәмә бонуслар бирергә әзер булуы турында хәбәр итте.
«Мәгариф өлкәсендә вакансияләр саны буенча Краснодар крае лидер булды, төбәктә 3,6 мең тәкъдим бар. Алга таба Иркутск һәм Свердловск өлкәләре бара, аларның һәркайсында 1,8 меңнән артык вакансия бар. Шулай ук Новосибирск өлкәсендә (1,5 мең), Чиләбе өлкәсендә һәм Красноярскида (1,3 меңәр) вакансия бар.