Сәясәт 25 февраль 2024 11:39

Россиядә ерак урыннарда һәм суда йөзүче судноларда вакытыннан алда тавыш бирү башланды

Скопировать ссылку

25 февральдә россиялеләрнең бер өлеше өчен ил Президентын сайлауда өстәмә тавыш бирү башланды. Ул ерактагы һәм барырга кыен булган урыннарга, шулай ук суда йөзүче судноларга кагыла. Элегрәк Россия Үзәк сайлау комиссиясе әлеге процедураның башлануы хакында игълан иткән иде.

Анда аз санлы сайлаучылар – болан үрчетү урыннарында, поляр һәм метеостанцияләрдә, төп тавыш бирү көннәрендә (15-17 март) суда йөзүче судноларда булган кешеләр катнаша.

Үзәк сайлау комиссияләрендә белдерүләренчә, халыкның бу категорияләре өчен тавыш бирү 14 мартка кадәр дәвам итә. Сайлау комиссиясе әгъзалары урыннарга вертолет, снегоход һәм җигүле этләр белән барачак.

Россия Федерациясе Президентын сайлау 15, 16 һәм 17 мартта узачак. Дүрт кандидатка сайлауда катнашырга рөхсәт бирелгән, алар - Владислав Даванков («Яңа кешеләр» партиясеннән), Леонид Слуцкий (ЛДПР партиясеннән), Николай Харитонов (КПРФ партиясеннән) һәм гамәлдәге дәүләт башлыгы Владимир Путин (үз-үзен тәкъдим итүче буларак).

#Россия Президентын сайлау

Сәхифәләр

Россиядә ерак урыннарда һәм суда йөзүче судноларда вакытыннан алда тавыш бирү башланды