Икътисад 22 июль 2025 09:58

Россиядә балалы гаиләләр өчен 18 айга кадәр ипотека каникуллары кертергә мөмкиннәр

Скопировать ссылку

Россиядә балалы гаиләләргә ипотека өчен түләүләрдән 18 айга кадәр кредит каникуллары бирә башларга мөмкиннәр. Документны РФ Финанс министрлыгы әзерләгән, ә кичә, 21 июльдә, аны Хөкүмәтнең закон проектлары эшчәнлеге комиссиясе хуплаган. Бу хакта РФ Хөкүмәтендәге чыганакларга сылтама белән «Известия» газетасы яза.

Россия Юристлар ассоциациясе идарәсе рәисе Владимир Груздев аңлатканча, ипотека кредиты түләүченең баласы туган яки уллыкка бала алган очракта ташламалы чор бирүгә хокукы барлыкка киләчәк. Әмма беренче бала туган яки уллыкка алынган очракта ипотека каникуллары алу өчен кайбер таләпләрне үтәргә кирәк булачак.

«<...> кредит түләүченең керемнәре яңа балалар туганчы булган уртача айлык кереме дәрәҗәсе белән чагыштырганда 20 проценттан күбрәккә кимегәнен расларга кирәк. Шул ук вакытта кредит килешүе буенча даими түләүнең күләме аның уртача айлык кеременең 40 процентыннан да ким булмаска тиеш», – дип аңлатты эксперт.

Икенче һәм аннан соңгы балалары туган яки уллыкка алынган гаиләләргә исә ипотека каникуллары алу өчен өстәмә шартлар үтәргә кирәк булмаячак.

Новелла кабул ителгән очракта, беренче баласы туган яки уллыкка алынган гаиләләргә кредит каникуллары бирү срогы алты айдан, ә икенче һәм аннан соңгы балалары туган яки уллыкка алынган гаиләләргә – 18 айдан артык булмаячак.

Финанс оешмалары әлеге чорның 7нче аеннан 18нче аена кадәр кредиттан файдаланган өчен процентлар исәпли ала. Мондый каникулларны ипотека кредиты гамәлдә булган вакыт дәвамында бер тапкыр рәсмиләштерергә мөмкин булачак.

РФ Финанс министрлыгы бәяләвенчә, Россиядә яшәүчеләрнең 39 проценты матди хәле һәм торак шартлары аркасында якын арада бала табарга җыенмый.

Элегрәк Финанс министрлыгында гаилә ипотекасын теркәлү урыны буенча бирү тәкъдимен хупладылар. Бу хакта «Татар-информ» хәбәр итте.

Сәхифәләр

Россиядә балалы гаиләләр өчен 18 айга кадәр ипотека каникуллары кертергә мөмкиннәр