Россиядә сайлау алды агитация кампаниясе башланды
Россиядә сайлау участокларында 63 миллион чамасы кеше тавыш бирүдә катнашырга мөмкин.
(Казан, 11 август, “Татар-информ”). Россиядә 9 сентябрьдә узачак Бердәм тавыш бирү көненә кадәр, сайлау алды кампаниясе кысаларында, массакүләм мәгълүмат чараларында агитация чоры башлана. Бу турыда “Интерфакс” хәбәр итә.
Сайлаулар турындагы закон буенча, теле-, радиотапшыру оешмалары каналларында һәм көндәлек басмаларда агитация тавыш бирүгә кадәр 28 көн кала башлана һәм тавыш бирергә бер көн кала 00.00 сәгатьтә тәмамлана. Агитация 11 августтан 8 сентябрьгә кадәр дәвам итә.
Үзәк сайлау комиссиясе секретаре Майя Гришина сүзләренчә, төбәкләрдә эфир вакытын һәм көндәлек басмада мәйдан күләмен билгеләү буенча җирәбәләр үткәргәннәр.
ҮСК мәгълүматы буенча, Россиядә төрле дәрәҗәдәге сайлау участокларында 63 миллион чамасы кеше тавыш бирүдә катнашырга мөмкин.