Россия туристлары Яңа елны дөньяның 95 илендә каршылый
Иң популяр илләр унлыгына Италия, Германия, Испания, Чехия, Бөекбритания, Франция, Грузия,Таиланд, Австрия һәм АКШ кергән.
(Казан, 27 декабрь, "Татар-информ"). Россия халкы Яңа елны каршыларга планлаштырган иң популяр илләр унлыгына Италия, Германия, Испания, Чехия, Бөекбритания, Франция, Грузия, Таиланд, Австрия һәм АКШ кергән. Сатылган авиабилетларның әлеге юнәлешләргә 60 процент чамасы туры килә, дип хәбәр итә OneTwoTrip сәяхәтләр сервисы. Бу хакта “Российская газета” хәбәр итә.
Агентлык аналитиклары Россия шәһәрләреннән 29-31 декабрьгә булган очышка сатылган авиабилетларны анализлаган.
Яңа ел сәяхәтләре географиясе узган сезоннан киңрәк. 2016-2017 ел каникулларында Россия туристлары 92 илнең 213 шәһәренә очкан булсалар, быел 95 илдән 228 шәһәрдә булачаклар.
Чит илгә Яңа елны каршыларга баручыларга эконом-класс билетлар ике якка уртача 29 мең сумга төшкән.