Россия төзелеш министры Ирек Фәйзуллин Казанга яшьләр форумына киләчәк

19 – 21 августта Казанда «Яшьләр һәм шәһәр мохите» II Бөтенроссия яшьләр форумы уздырыла. Аны ДОМ.РФ үсеш институты һәм «Шәһәр реновацияләре» гомумроссия форумы ярдәме белән Россиянең Төзелеш һәм торак-коммуналь хуҗалык министрлыгы һәм Татарстан Хөкүмәте оештыра. Форумның мәртәбәле кунагы Россия төзелеш министры Ирек Фәйзуллин булачак, дип хәбәр итә чараны оештыручылар.

«Форум уңайлы шәһәр мохите булдыруга юнәлдерелгән яңа идеяләр генерацияләү өчен уникаль мәйданчык булыр, ә сезнең катнашуның йомгаклары озак вакытлы нәтиҗә бирер дип ышанам. Беренче Яшьләр форумы төзекләндерү буенча булды, аны уңышлы дип санарга була, димәк, икенчесе дә булачак», – дигән министр.

Форум «Кече шәһәрләрне һәм тарихи җирлекләрне үстерү» Бөтенроссия форумы кысаларында уза һәм шәһәр төзелеше, архитектура, дизайн һәм цифрлы технологияләр өлкәсендә Россиянең 89 төбәгеннән 400дән артык студент һәм яшь белгечне җыячак. Ул инде үзен шәһәрләр үсешенә җәлеп ителгән яшьләр өчен алдынгы идеяләр, проект карарлары һәм карьера мөмкинлекләре булдыру өчен уникаль платформа буларак танытты. Төп максат – яшь катнашучыларга профессиональ һәм иҗади яктан үзләрен таныту өчен шартлар тудыру, шулай ук аларда төзекләндерү өлкәсендә карьера мөмкинлекләрен күзаллау булдыру.

Өч көн дәвамында катнашучыларны бай программа көтә: 30дан артык чара – пленар утырышлар, эксперт дискуссияләре, күргәзмә экспозицияләре, проект сессияләре, шулай ук тармакның әйдәп баручы белгечләре белән нетворкинглар һәм очрашулар. Эш дүрт тематик трек буенча оештырыла.

«Шәһәр энергиясе» интенсивы. Монда яшь урбанистлар, архитекторлар һәм активистлар территорияләр үсеше өчен карарлар тәкъдим итә. Монда идеяләр проектка, ә проектлар – төзекләндерү объектлары өчен Бөтенроссия онлайн-тавыш бирүнең бер өлешенә әверелә.

«Шәһәр медиалары» лабораториясе. Бу лабораториядә яшь авторлар, активистлар һәм шәһәр энтузиастлары шәһәр тормышы, битараф булмаган кешеләр турында үзләренең беренче медиапроектларын ясаячак.

«Фиджитал-урбанистика» остаханәсе. Әлеге белем бирү модулендә яшь урбанистлар, дизайнерлар һәм технологик энтузиастлар цифрлы кораллар һәм реаль интервенцияләр аркылы шәһәр мохитен үзгәртергә өйрәнә.

«Һөнәри траектория». Бу ачык диалогта катнашучылар шәһәрләрне үстерү юллары эзләячәк. Монда идеяләр алмашу, җанлы нетворкинг һәм төбәкнең төп эш бирүчеләре аркылы проектлар, иҗади коллективлар һәм карьера мөмкинлекләре туа.

«Яшьләр һәм шәһәр мохите» II Бөтенроссия яшьләр форумына сылтама аша 15 августка кадәр теркәлергә була.

Чараны оештыручылар видеосы.