Җәмгыять 3 сентябрь 2017 12:58

Россия судларында электрон дәгъва тапшыру өчен 90 мең шәхси кабинет ачылган

Ел башыннан бирле гомуми юрисдикциядәге федераль судларга электрон рәвештә 132 меңнән артык документ тапшырылган инде.

Скопировать ссылку

(Казан, 3 сентябрь, «Татар-информ»). Гомуми юрисдикциядәге Россия судлары сайтларында гражданнарга 100 меңгә якын шәхси кабинет ачылган. Бу – судларга мөрәҗәгатьләрне электрон рәвештә юлларга мөмкинлек бирә. Россия Федерациясе Югары суды каршындагы Суд департаменты генераль директоры Александр Гусев ТАСС агентлыгына биргән интервьюсында шулай дип белдергән.

1 гыйнвардан гомуми юрисдикциядәге судларга дәгъваларны электрон рәвештә – судның рәсми сайтындагы махсус бүлектә булдырылган кулланучының шәхси кабинеты аша тапшыруны көйләүче канун үз көченә керде.

«Хәзер һәркемнең мөстәкыйль рәвештә яки үз вәкиле аша судларга мөрәҗәгать юллау мөмкинлеге бар. Моның өчен дәүләт хезмәтләре порталында Бердәм идентификация һәм аутентификация ситемасында исәпкә алу язуы яки көчәйтелгән квалификацияле электрон имза булырга тиеш», – дип искәртте Александр Гусев. Шулай ук шәхси кабинет аша судьяның электрон имзасы белән расланган белдерү кәгазе, судларга чакыру, суд актларының күчермәләрен һәм суд документларын алырга мөмкин.

«Ел башыннан бирле гомуми юрисдикциядәге федераль судларга электрон рәвештә 132 меңнән артык документ тапшырылган инде», – диде Суд департаменты генераль директоры.

#Суд

Сәхифәләр

Россия судларында электрон дәгъва тапшыру өчен 90 мең шәхси кабинет ачылган