Россия су спорты төрләре буенча Европа чемпионатын кабул итү хокукын саклап калды
Россиянең 2028 елда су спорты төрләре буенча Европа чемпионатын кабул итү хокукы бар. Бу хакта ТАСС агентлыгына European Aquatics президенты Антониу Силва хәбәр итте.
Аның сүзләренчә, башта Россия турнирны 2024 елда уздырырга тиеш иде, әмма үзгәрешләрдән соң чемпионатны 2028 елга күчерделәр. Хәзер European Aquatics вазгыятькә бәя бирергә һәм аның хакында барлык кызыксынган яклар белән, шул исәптән Россиянең Су спорты төрләре федерациясе һәм Татарстан Хөкүмәте белән фикер алышырга тиеш.
Силва билгеләп үткәнчә, мондый консультацияләр якын көннәрдә узачак. Шуннан соң мәсьәләне European Aquatics бюросы катнашындагы фикер алышуга чыгарырга ниятлиләр, ахыргы карарны ул кабул итәчәк.
Элегрәк Татарстанның спорт министры Владимир Леонов ТАСС агентлыгына 2028 елда Казанда узачак су спорты төрләре буенча Европа чемпионаты әлегә календарьда калуы турында хәбәр иткән иде. Аның сүзләренчә, республика European Aquatics белән сөйләшүләрне дәвам итә.