Россия мөслимәләре Абу-Дабида Бөтендөнья хатын-кызлар саммитында катнаша
Россия мөселманнары Диния нәзарәтенең Мәдәният департаменты җитәкчесе урынбасары Гүзәл Мубинова һәм Мәскәү җәмигъ мәчете мәдрәсәсе укытучысы Гүзәлия Якупова «Дөнья, социаль интеграция һәм иминлекне тәэмин итүдә хатын-кыз - лидерларның роле» 2023 Бөтендөнья хатын-кызлар саммитында катнаша. Ул 21-22 февральдә Берләшкән Гарәп Әмирлекләре башкаласы Абу-Дабида уза. Россия Мөфтиләр шурасы шул турыда яза.
Ачылыш тантанасында чыгыш ясаганда, Саммитның Оештыру комитеты рәисе доктор Али Рәшит Әл-Нуайми: «Без тарихның яңа борылышында торабыз, хәзер хатын-кыз иҗтимагый эшчәнлек, яңа буын тәрбияләү, бала өчен беренче мәктәп булып калган шартларда, Көнбатышка таба борылмыйча, балаларны тулысынча Ислам кушканча тәрбияләргә тиеш», – дип билгеләп үтте.
Доктор Әл-Нуайми үзенең Россиягә килүен, Россия мөселманнарының мәдәниятенә, тарихына һәм эшчәнлегенә соклануын әйтте. Россиядә ислам тарихы һәм Россия өммәте тормышы белән мөмкин кадәр күбрәк кеше танышсын өчен ул барлык инструментларны һәм мөмкинлекләрне кулланырга чакырды, чөнки, кызганычка, гарәп илләре һәм Европа мөселманнары бу турыда аз белә.
Саммитның беренче көне җәмгыятьнең тотрыклы үсеше, хәйриячелек һәм фәкыйрьлеккә каршы көрәш, мәгариф һәм фән өлкәсендә хатын-кызлар лидерлыгы темаларына багышланган иде. Икенче көнне мәдәният һәм сәнгать, хатын-кызлар дипломатиясе һәм медиа мөмкинлекләр мәсьәләләре турында фикер алыштылар.