Җәмгыять 9 гыйнвар 2018 14:13

Россия һәм Мисыр Мәскәү белән Каһирә арасындагы рейслар саны турында килеште

15 декабрьдә Россия Транспорт министрлыгы һәм Мисыр Гражданнар авиациясе министрлыгы авиаэлемтәне яңарту турындагы беркетмәне имзалады.

Скопировать ссылку

(Казан, 9 гыйнвар, «Татар-информ»). Мәскәү һәм Каһирә арасында авиаэлемтә яңадан җайга салынганнан соң әлеге ике шәһәр арасында атнасына алты даими рейс ясалачак. Бу хакта аэропортлар белән идарә итү буенча Мисыр холдинг компаниясендәге чыганакка сылтама ясап «РИА Новости» агентлыгы хәбәр итә.

«Каһирә – Мәскәү һәм Мәскәү – Каһирә маршрутлары буенча EgyptAir һәм «Аэрофлот» авиакомпанияләре тарафыннан атнасына өчәр рейс ясау турында килешүгә ирешелде», - дип белдерде Мисыр вәкиле.

Шул ук вакытта, ул әлеге рейсларның расписаниеләре хакында фикер алышулар әле дәвам итүен искәртте.

Шулай ук билет бәяләре турында да килешүгә ирешелде.

Каһирә һәм Мәскәү арасында тәүге рейслар февраль башында ясалыр дип көтелә.

Россия Президенты Владимир Путин 11 декабрьдә Мисыр Президенты Абдел Фәттах әс-Сиси белән очрашу вакытында ике ил арасында авиаэлемтәне яңартуга әзер икәнлеген белдергән иде.

#Мисыр #авиаочышлар

Сәхифәләр

Россия һәм Мисыр Мәскәү белән Каһирә арасындагы рейслар саны турында килеште