Россия мәгариф министры Worldskills дөнья чемпионатына әзерлекне югары бәяләде
Ольга Васильева дөнья чемпионатында Россия җыелмасы җиңүенә өметен белдерде.
(Казан, 24 май, "Татар-информ", Гөлнар ГариФуллина). Россия мәгариф министры Ольга Васильева Казанның эшче һөнәрләр буенча Worldskills дөнья чемпионатына әзерлеген югары бәяләде. Бу хакта ул бүген журналистларга "Татнефть Арена"да Worldskills Russia илкүләм чемпионатын ябу тантанасы алдыннан әйтте.
"Дөнья чемпионатына барысы да әзер. Барлык биналар да, җиһазлар да әзер. Коммуникацияләрне сынап карадык. Яхшы нәтиҗәләр дә булыр дип өметләнәбез. 45нче дөнья чемпионатында җиңүебезне телибез", - дип белдерде федераль министр.
Ольга Васильева илкүләм чемпионат финалының бик яхшы оештырылганын билгеләп үтте. "Барлык стандартларга җавап бирәбез дип уйлыйм. Чемпионатның әзерлек дәрәҗәсе югары. Мондый әзерлекнең әле булганы юк иде. Моны элекке ярышларда катнашучылар да билгеләп үтте", - диде Ольга Васильева.
Бу минутларда VII илкүләм чемпионатны ябу тантанасы уза. Дөнья чемпионаты исә 22-27 августта узачак.