Россия – Иран матчына билетлар сатуга чыкты
Россия футбол берлеге 2026 елның 29 сентябрендә Казанда узачак Россия һәм Иран җыелмалары арасындагы иптәшләрчә матчка билетлар сатуны ачты.
Уен «Ак Барс Арена» стадионында узачак һәм Мәскәү вакыты белән 19:30да башланачак.
Билет бәясе 500 сумнан башлана. Аларны «Яндекс Афиша» сайтында гына сатып алырга мөмкин.
Шунысын билгеләп үтү мөһим, бу матчка бару өчен җанатар паспорты (Fan ID) таләп ителми – милли җыелманың иптәшләрчә уеннары җанатар картасын рәсмиләштерү өчен мәҗбүри исемлеккә керми. Биш яшькә кадәрге балалар, аерым урын алып тормыйча, якын туганнары озатуында бушлай уза.
Халыкның аз хәрәкәтләнүче төркемнәре өчен заявкалар электрон почта аша (mgn@rfs.ru) 25 сентябрьгә кадәр кабул ителә.
Матч алдыннан стадион территориясендә җанатарлар өчен киң күңел ачу программасы оештырылачак. Анда концерт номерлары, автограф-сессияләр, төрле елларда Россия җыелмасы уенчылары катнашында футбол активлыгы, призлар уйнату, шулай ук балалар һәм өлкәннәр өчен чаралар булачак.
Матч 21 сентябрьдә Россия җыелмасының көзге укыту-тренировка җыены кысаларында узачак. Россиялеләрнең көндәше – Иран җыелмасы – 2026 елгы дөнья чемпионатында катнаша.
Төркем этабында иранлылар Яңа Зеландия, Бельгия һәм Мисыр белән тигез исәпкә уйнадылар, әмма плей-оффка чыга алмадылар. ФИФА рейтингында Иран 22 нче урында тора, Россия җыелмасы – 35 нче урында.
Командалар барлыгы дүрт тапкыр очраштылар, һәм барлык матчлар да иптәшләрчә характерда булды. Соңгы очрашу 2025 елның 10 октябрендә Волгоградта узды, анда Россия 2:1 исәбе белән җиңү яулады. 2023 һәм 2017 елларда командалар ике тапкыр тигез исәпкә уйнады (1:1), ә 2011 елда Иран көчлерәк булып чыкты (1:0).
Татарстанның спорт министры Владимир Леонов билгеләп үткәнчә, республика җанатарлар һәм уенчылар өчен максималь уңайлы шартлар тудырырга әзер.