Россия халкын «Үлемсез полк» акциясендә онлайн катнашырга чакыралар
«Россиянең Үлемсез полкы» Татарстан төбәк бүлеге җитәкчесе Ринат Хәбибуллин республика халкын акциягә онлайн кушылырга чакырып мөрәҗәгать итте.
(Казан, 24 апрель, «Татар-информ»). «Россиянең Үлемсез полкы» Гомумроссия хәрәкәтендә катнашучылар акцияне онлайн режимда үткәрүгә кушылуны сорый. Бу уңайдан 24 апрельдә «Россия Үлемсез полкы» иҗтимагый хәрәкәтенең Татарстан төбәк бүлеге җитәкчесе Ринат Хәбибуллин республика халкына видеомөрәҗәгать итте. Ул «Үлемсез полк» акциясен онлайн-режимда башларга тәкъдим итте. Бу хакта «ВКонтакте» социаль челтәрендә әйтелә.
Татарстанда «Үлемсез полк» онлайн-акциясенә кушылу өчен, Бөек Ватан сугышында катнашкан туганнар яки якыннар турында фотосурәтне яки аларның язмышы турында видеоны социаль челтәрләрдә #БессмертныйПолкРоссии #БессмертныйПолкТатарстан #БессмертныйПолкОнлайн хэштегы белән урнаштырырга кирәк.
Барлык язмалар да «ВКонтакте» да https://vk.com/polkrt сылтамасы белән Татарстан Республикасында «Россия Үлемсез полкы» хәрәкәте төбәк бүлегенең рәсми берләшмәсендә агрегацияләнәчәк. Акция нәтиҗәләре буенча Бөек Ватан сугышында катнашучыларның барлык тарихларын берләштерүче Гомумроссия онлайн-ресурсы булачак.
«Россиянең Үлемсез полкы» - Бөек Ватан сугышы чоры турында шәхси истәлекләрне саклау буенча халыкара иҗтимагый гражданлык-патриотик хәрәкәте. Шулай ук ул әлеге хәрәкәт оештыра торган акция исеме. 2015 елда аны булдыру өчен илнең 60 төбәгеннән вәкилләр чыгыш ясады. Бүгенге көндә хәрәкәт 76 төбәк бүлеген һәм барлык континентларда 200дән артык халыкара координаторны берләштерә.