Җәмгыять 24 декабрь 2023 11:47

Россия Гидрометеоүзәге 2024 елның гыйнвары җылы булачагын фаразлады

Скопировать ссылку

Илнең бөтен территориясендә диярлек яңа елның беренче аенда температура нормадан бер градуска югары булачак. Бу хакта «Российская газета» РФ Гидрометеоүзәгенең лаборатория мөдире Людмила Паршинага сылтама белән хәбәр итә.

Әйтик, төньяк-көнбатышта төннәрен һава температурасы -10 градус, көндез -5 градус тәшкил итәчәк. Үзәк округның төньягында, шул исәптән Мәскәү төбәгендә шуңа якын температура көтелә. Дөрес, төннәрен суытканда термометрның терекөмеш баганасы -21 градуска, ә көндез -15 градуска кадәр төшәргә мөмкин.

Россиянең үзәк өлешенә килгәндә, анда салкын булачак. Әйтик, көньяк Уралда төннәрен һава температурасы -19..-24 градус, көндез исә -10..-15 градус тәшкил итәр дип көтелә. Себернең көньягында тагын да суыграк (төнлә -25 градуска кадәр, көндез -14..-19 градус) булачак. Красноярск краенда һәм Иркутск өлкәсендә бер градуска суыграк булуы фаразлана.

Гыйнварда Россиянең Европа өлешендә һәм Уралда күп явым-төшем көтелә. Красноярск краеның төньягында һәм Көнбатыш Себернең көньягында явым-төшем күләме нормага якын булачак. Шунысын да искәртик, гыйнварда көн озынлыгы сизелерлек арта. Әгәр ай башында көн озынлыгы 7 сәгать 20 минут тәшкил итсә, ай ахырында ул 1 сәгать 20 минутка артачак.

Сәхифәләр

Россия Гидрометеоүзәге 2024 елның гыйнвары җылы булачагын фаразлады