Россия Герое Иван Жарский хатыны белән Мәскәүдә Татарстан вәкиллегендә булды
Татарстан Вице-премьеры – Татарстан Республикасының Россия Федерациясендәге вәкаләтле вәкиле Равил Әхмәтшин Россия Герое Иван Жарский һәм аның хатыны Елизавета белән очрашты.
Татарстанның Вәкаләтле вәкиллеге матбугат хезмәте хәбәр иткәнчә, Кара диңгез флотының диңгез пехотасы өлкән лейтенанты Иван Жарский тумышы белән Татарстаннан, аңа 27 яшь. Ул үзен һәрвакытта да офицер итеп кенә күргән һәм беренче погоннарын Казанның кадет интернат-мәктәбендә кигән.
Равил Әхмәтшин кунакларга Вәкаләтле вәкиллекнең эшчәнлеге турында, шул исәптән, хәрбиләргә – махсус операциядә катнашучыларга ярдәм итүгә юнәлгән инициатив эш турында да сөйләде.
Иван Равил Әхмәтшинны быел җәйдә Севастопольдә үзенә тапшырылган «Армия генералы А. С. Гәрәевкә 100 ел» истәлекле медале өчен рәхмәт әйтте.
«Кызганыч, мин сезнең Флот офицерлары йортында Кара диңгез флотының шәхси составы белән очрашуыгызда була алмадым. Әмма миңа соңыннан сездән шушы истәлек медале алу бик күңелле булды», – диде Россия Герое.
Равил Әхмәтшин Иван Жарскийны Татарстан вәкиллеге каршында оештырылган Офицерлар клубы очрашуына чакырды. Чара Россиядә 9 декабрьдә билгеләп үтелә торган Геройлар Көненә багышланачак.
Өлкән лейтенант Жарский үзенең тыйнаклыгы белән дан казанды. Кыр формасындагы хәрби хезмәткәр һәм диңгез пехотасының кара береты турындагы видео шундук социаль челтәрләрдә таралды, миллионлаган карау җыйды.