Туклану, биотехнологияләр һәм азык-төлек куркынычсызлыгы федераль тикшеренү үзәге белгечләре махсус операциядә катнашучы хәрбиләр өчен махсуслаштырылган азык-төлек продуктлары әзерләгән. Бу хакта «Труд» газетасы үзәкнең матбугат хезмәтенә сылтама белән яза.
Билгеләп үтелгәнчә, әлеге махсус рацион игътибарны һәм түземлекне арттыра. Организм экстремаль шартларда алга куелган бурычны уңышлы үтәр өчен бөтен көчне бергә туплый. Бу продуктлар һәм рационнар хәрбиләргә һәм хокук саклау органнары хезмәткәрләренә авыр һава торышы шартларын, түбән температураларны уңышлы кичерергә ярдәм итә алачак. Махсус рацион шулай ук стрессларга каршы торучанлыкны арттырырга, йокы туймауны өлешчә компенсацияләргә мөмкинлек бирәчәк.
Үзәктә хәбәр итүләренчә, «Донбасс» продуктларын җитештерә башлау өчен барысы да әзер, бары тик тиешле команда гына кирәк. Махсус туклануны әзерләүчеләр раслаганча, рационны тәшкил иткән күп әйберләр галәмдә уңышлы сынау узган инде.