Җәмгыять 30 гыйнвар 2017 15:21

Россия Федерациясендә даруларга махсус тамга сугыла башлаячак

Бу система даруханәләрдә ялган продукциягә каршы көрәш алып барылу уңаеннан тормышка ашырыла.

Скопировать ссылку

(Казан, 30 гыйнвар, “Татар-информ”). Россиядә даруханәләргә ялган дару кертүгә чик куя торган махсус тамгалар сугу системасы гамәлгә куела. Бу хакта INTERFAX.RU хәбәр итә.

"Фальсификацяле ялган продукциянең даруханәләргә үтеп керүенә чик куячак даруларга махсус тамга суга башлау системасын кертү турында документка кул куелды”, – дип белдерде Россия Федерациясе Премьер-министры Дмитрий Медведев.

Ул, проект кысаларында махсус автомат система булдырылачак, дип аңлатты. Ягъни моннан соң продукция ясалган урыннан алып, аның даруханәгә кадәр үткән юлын теләсә кайсы кеше махсус сканер җиһазы яисә үзенең кесә телефоны аша сатып алганда ук карый, шулай итеп, аның легальлеген тикшерә алачак.

Россия Федерациясенең вице-премьеры Аркадий Дворкович бу эш Федераль салым хезмәте һәм Россия Федерациясе Сәламәтлек саклау өлкәсендә күзәтчелек Федераль хезмәтенең уртак эшчәнлеге нәтиҗәсе булуын искәртте.

Аның әйтүенчә, беренче этапта бер ел дәвамында системада катнашу ирекле булачак. “Хәзер үк бу эштә катнашырга иң зур җитештерүче оешмалар инде теләк белдерде. Шулай ук төп дистрибьютор челтәрләр һәм бер төркем регионнар моңа әзер булуларын хәбәр итте", – диде Дворкович.

#дару #тамга сугу

Сәхифәләр

Россия Федерациясендә даруларга махсус тамга сугыла башлаячак