Икътисад 1 апрель 2017 11:11

Россия базарындагы кымызның 50 процентын башкортлар җитештерә

Ялган кымыз ясаучылар бия сөте урынына сыер яки башка хайван сөте куллана.

Скопировать ссылку

(Казан, 1 апрель, “Татар-информ”). Россия күләмендә башкорт кымызы җитештерү 46 процентны тәшкил иткән. Башкортстан Республикасының Авыл хуҗалыгы министрлыгы мәгълүматлары буенча, узган елда меңнән артык тонна кымыз җитештерелгән. Бу, 2015 ел белән чагыштырганда, якынча 10 процентка күбрәк. Җитештерү буенча беренчеләр -Баймак, Әбҗәлил, Бәләбәй һәм Әлшәй районнары.

Башкортстанда кымыз җитештерүне үстерү турында Юматов шифаханәсендә уздырырлган конференциядә сөйләштеләр. Очрашуда БР авыл хуҗалыгы министры урынбасары Азат Җиһаншин, шулай ук кымыз җитештерүчеләр, фермер хуҗалыгы, сәүдә оешмалары вәкилләре, шәхси эшмәкәрләр һәм галимнәр катнашты.

Конференциядә катнашучылар фикеренчә, ялган кымыз ясаучылар тармакка тискәре йогынты ясый. Кагыйдә буларак, алар бия сөте урынына сыер һәм башка хайван сөтен куллана. Намуслы фермерларның мәнфәгатьләрен кымыз җитештерүчеләр берләшмәсе яки җәмәгать оешмасы төзү ярдәмендә хәл итеп була.

Чын кымызны халыкка таныту өчен, җитештерүчеләр кымыз фестивале уздырырга тәкъдим итә. Шулай ук пастеризация узган бия сөтен дә сатуга чыгарырга дигән тәкъдимнәр бар.

Башкорт дәүләт аграр университеты доценты Светлана Канарейкина хәбәренә караганда, республика галимнәре пастеризация режимын көйләгән һәм моңа патент та алган. Югары уку йортында кымыз ясаучыларга квалификация күтәрү курслары оештырырга дә әзерләр.

#кымыз #башкорт кымызы

Сәхифәләр

Россия базарындагы кымызның 50 процентын башкортлар җитештерә