Роспотребнадзор Яр Чаллыдагы Covid-19 белән бәйле вазгыятькә бәя бирде

Шәһәрдә авыручылар саны республика буенча уртача күрсәткечтән югарырак булса да, өстәмә чикләүләр кертү планлаштырылмый.

Скопировать ссылку

(Казан, 24 июнь, «Татар-информ», Зилә Мөбәрәкшина). Яр Чаллыда коронавирусны йоктыручылар саны республика буенча уртача күрсәткечтән югары булуга карамастан, вазгыять стабиль дип бәяләнә. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның ТР буенча идарәсе җитәкчесе урынбасары Любовь Авдонина сөйләде.

«Мәсәлән, Казанда өйдә булган йогышлы инфекция чыганаклары күбрәк. Ә Яр Чаллыда киресенчә, сәнәгать оешмаларында теркәлүчеләр саны артып китә. Гади вазгыятьтән тайпылышлар күрмибез, саклану чаралары Яр Чаллыда да республикадагы кебек үтәлеп бара. Өстәмә чикләүләр кертү яисә булган чикләүләрне бетерү соравы әлегә каралмый», — диде ул.

Татарстан Сәламәтлек саклау министры урынбасары — Казанның Сәламәтлек саклау идарәсе башлыгы Владимир Жаворонков Сәламәтлек саклау министры Марат Садыйков республика прокуроры Илдус Нәфыйков белән Яр Чаллыда булып кайтканын искәртте. «Пациентларга ярдәм өйдә дә, дәвалану урыннарында да күрсәтелә», — дип өстәде ул.

#коронавирус #Covid-19 #Любовь Авдонина

Сәхифәләр

Роспотребнадзор Яр Чаллыдагы Covid-19 белән бәйле вазгыятькә бәя бирде