Роспотребнадзор идарәсендә чит илдә коронавирус йоктырсаң нишләргә икәнен аңлаттылар
Эпидемиологик вазгыять киеренке булганлыктан, татарстанлыларга үз гомерләрен куркыныч астына куймаска һәм чит илгә сәфәрләрне кичектереп торырга кирәк.
(Казан, 6 август, «Татар-информ», Эвелина Киселёва). Чит илгә чыккан Татарстан кешеләре, яңа коронавирус инфекциясенең билгеләре күзәтелгән очракта, җирле табибларга мөрәҗәгать итәргә тиеш. Роспотребнадзорның ТР буенча идарәсе башлыгы урынбасары Любовь Авдонина «Татар-информ» агентлыгында узган матбугат конференциясендә шулай дип белдерде.
«Әлеге илдәге табибларга мөрәҗәгать итәргә, әгәр кунакханәдә яшисез икән, анда табиб булу-булмавын белешергә кирәк. Бу – идеаль вариант. Йә булмаса кунакханә хезмәткәрләре сезгә кая мөрәҗәгать итәргә кирәклеген әйтәчәк. Бу ашыгыч ярдәм, яки якын-тирәдәге медицина оешмасы булырга мөмкин», - диде Авдонина.
Ул билгеләп үткәнчә, эпидемиологик вазгыять киеренке булганлыктан, татарстанлыларга үз гомерләрен куркыныч астына куймаска һәм чит илгә сәфәрләрне кичектереп торырга кирәк. «Без быел үзебезнең территориядә, Татарстан Республикасында ял итәргә киңәш итәбез», - диде Роспотребнадзорның ТР буенча идарәсе башлыгы урынбасары.
«Татар-информ» агентлыгы Төркия курортларында яңа төрдәге Covid-19 коронавирус инфекциясен йоктыру очраклары кисәк артуы хакында хәбәр иткән иде инде.