Ринат Мөхәммәдиев: Татарларның рус телендә дә матбугаты булырга тиеш
Бөтендөнья татар конгрессы оештырган VIII Бөтенроссия татар журналистлары форумынының йомгаклау тантанасында язучы Ринат Мөхәммәдиев татар халкының гореф-гадәтләре, тарихы белән таныштыручы рус телендә чыгучы басмаларның да булырга тиешлеген әйтте.
«Соңгы 21 елда мин Мәскәүдә рус телендә «Татар дөньясы» («Татарский мир») газетасын чыгарам. Кайвакыт миңа: «Бу эш кирәкме соң?» – диләр. Бүгенге көндә татарларның 70 проценты татарча белми, ләкин күңелләрендә татарлык бар ул кешеләрнең. Ул кешеләрне без бервакытта да онытырга тиеш түгел. Татарларның рус телендә дә матбугаты булырга тиеш. Тарих, татар рухы һәм милли традицияләр белән таныш булган кеше ирексездән, үзе булмаса да, оныкларын һәм балаларын татарча өйрәтергә омтылачак», – диде ул.