Риман Гыйлемханов: Журналист геройны чын күңелдән ярата һәм ачулана белергә тиеш
«Миндә гаҗәпләнү, соклану хисе – мулдан. Әгәр шул хисләр булмаса, журналистикада эшли алмас идем», - диде журналист.
«Ватаным Татарстан» газетасы журналисты Риман Гыйлемханов «Интертат» электрон газетасында «Татар журналисты» сәхифәсендә кунакта булды. Аның фикеренчә, журналист геройны чын күңелдән ярата, ачулана, аңа соклана, гаҗәпләнә белергә тиеш.
«Миңа Миңназыйм Сәфәров: «Риман абый, яратып тәнкыйтьлисең син», – дип әйтә. Түбәнсетеп түгел, үз итеп, киңәш биреп тәнкыйтьләргә кирәк. Миндә гаҗәпләнү, соклану хисе – мулдан. Әгәр шул хисләр булмаса, журналистикада эшли алмас идем. Әңгәмәдәшеңне үзеңнән акыллырак санарга тиешсең, дигән хәдис бар икән. Кешене «бетереп ташлыйм» дип түгел, аңа ярдәм итеп булмас микән, дип язарга кирәк», - диде ул «Татар-информ»га биргән әңгәмәсендә.
Риман Гыйлемханов әйтүенчә, матбугатта күп кенә жанрлар юкка чыкты.
«Яшь вакытта фельетоннарны яратып укый идек, ул жанр хәзер юк. Күбесе – ярым мәгълүмати газеталар, мәгълүмат бик күп. Мәсәлән, «Ватаным Татарстан»да «Әйтеп кенә бактым» дигән «колонка»га эсселар язам. Аларны туплап, китап итеп чыгарырга исәп бар. Тема төрлелеге дә борчый мине», - диде журналист.