Рифкать Миңнеханов: Тукай медале булдырырга һәм шагыйрь турында фильм төшерергә кирәк
Габдулла Тукай иҗаты бүген актив саклана һәм таратыла. Бу хакта татар әдәбияты классигының 140 еллыгына багышланган бөтенроссия фәнни конференциясенең пленар сессиясендә Татарстан Фәннәр академиясе президенты Рифкать Миңнеханов белдерде.
«Бу эштә Татарстан шәһәрләрендә һәм аннан читтә урнаштырылган һәйкәлләр мөһим инструмент булып тора», – дип билгеләп үтте ТР Фәннәр академиясе җитәкчесе.
Интеллигенция өчен Тукай иң элек фәлсәфәче һәм реформатор, ә гади укучылар өчен яраткан балалар әкиятләре авторы булып кала, дип ассызыклады ул.
«Тукай мирасы биюдә һәм музыкада гәүдәләндерелә. Шулай ук заманча цифрлы форматлар ярдәмендә дә популярлаштырыла: музейларда виртуаль турлар, шигырь аудиоязмалары белән мобиль кушымталар һәм онлайн-марафоннар оештырыла. Алар яшьләрне мәдәни мирасны саклау процессына җәлеп итә», - дип өстәде Татарстан Республикасы Фәннәр академиясе башлыгы.
Рифкать Миңнеханов шулай ук Татарстанда бөек татар авторы исемендәге премия тапшырылуын искәртте һәм шагыйрьнең 150 еллыгына истәлекле медаль дә булдырылачагына ышаныч белдерде. Моннан тыш, «Татар-информ»да узган матбугат конференциясендә Тукай турында фильм төшерү идеясе турында әйтелде.
«Бу тема турында уйлаячакбыз. Күптән түгел Шиһабетдин Мәрҗани турында фильм төшерелде. Минемчә, Тукай да моңа лаек. Бездә аны яхшы уйный алучы артистлар бар», – диде ТР Фәннәр академиясе президенты.