Рифкать Миңнеханов Татарстан Фәннәр академиясенең яңа вице-президентларын тәкъдим итте
Татарстан Фәннәр академиясе вице-президентларын Россия фәне көненә багышланган тантаналы җыелышта әлеге оешма җитәкчесе Рифкать Миңнеханов тәкъдим итте. Бу турыда «Татар-информ» хәбәрчесе Надежда Гордеева яза.
«Мөмкинлектән файдаланып, академиклар һәм әгъза-мөхбирләргә билгеләнгән җитәкчеләрне тәкъдим итәсе килә», - диде Татарстан Фәннәр академиясе президенты.
Шулай итеп, Айнур Тимерханов социаль-гуманитар юнәлеш, ә Ләйсән Әбҗәлилова табигый-фәнни юнәлеш буенча вице-президент булды.
Моннан тыш, 1 марттан стратегия, икътисад һәм социология буенча вице-президент итеп Марат Сафиуллин билгеләнәчәк.
Татарстан Фәннәр академиясе президентының аналитика, халыкара һәм конгресс-күргәзмә эшчәнлеге, массакүләм мәгълүмат чаралары буенча урынбасары Рөстәм Камалов, административ-хуҗалык тәэминаты буенча Дамир Гыйльметдинов булды.