Рифкать Миңнеханов: Татар шагыйренең юбилее беренче тапкыр федераль дәрәҗәгә күтәрелә
Россия Федерациясе Президентының 2036 елда Габдулла Тукайның 150 еллыгын бәйрәм итү турындагы указга кул куюы – беркетмә юбилей карары түгел, ә Тукайны дәүләт тарафыннан гомуммилли масштабтагы шәхес итеп тану, дип саный Татарстан Республикасы Фәннәр академиясе президенты Рифкать Миңнеханов.
«Татар шагыйренең юбилее беренче тапкыр федераль дәрәҗәгә күтәрелә», – дип сөйләде «Татар-информ»га Рифкать Миңнеханов.
Татарстан Республикасы Фәннәр академиясе президенты фикеренчә, Татарстан Республикасы Рәисе Рөстәм Миңнехановның ИСЕСКО химаясендә Тукай исемендәге халыкара премияне гамәлгә кую турындагы инициативасы белән бергә системалы ике дәрәҗәле конструкция барлыкка килә: өстә – федераль дәүләт импульсы, тышта – ислам дөньясының халыкара гуманитар мәйданчыгы.
2036 елда Тукайның 150 еллыгын бәйрәм итү шул ук исемдәге премия өчен дә мөмкинлекләр тәрәзәсен ача.
«Бу Тукай премиясе статусын күтәрү өчен реаль алшартлар тудыра. Бүген ул Татарстан Республикасының Дәүләт премиясе булып кала. Әмма федераль указ аның статусын Бөтенроссия күләменә кадәр киңәйтү яки төрки һәм ислам дөньясында татар мәдәниятен үстерү коралы буларак Тукай исемендәге аерым халыкара премияне гамәлгә кую мәсьәләсен күтәрергә сәяси нигез бирә», - дип саный республика Фәннәр академиясе президенты.