Рифат Җамал: Бүген татар әдәбияты зур югалту кичерә
Күренекле татар шагыйрәсе, журналист, Татарстан Республикасы Язучылар берлеге әгъзасы Нәҗибә Сафина белән хушлашу мәрасиме үтте. ТР Язучылар берлеге рәисе урынбасары Рифат Җамал биредәге чыгышында татар әдәбияты зур югалту кичерүен билгеләде.
Фото: Юлай Низаев архивыннан.
Шигырь бәйрәмендә.
«Бүген татар әдәбияты зур югалту кичерә. Нәҗибә Сафина турында бик озаклап сөйләп була. Ул безнең халкыбызның билгеле шәхесе. Татар халкы өчен күп көч куйган шәхес», — диде Рифат Җамал.
Шулай ук ТР Язучылар берлеге рәисе урынбасары Илсөяр Ихсанова да бәхилләшү барышында мәрхүмәнең милләтпәрвәр шәхес булуын ассызыклады.
«Нәҗибә апа бөтен җирдә дә татар телен, татар мәгарифен күтәрергә кирәк, дип сөйләде. Ул үзенең йөрәк авазын бар тарафка да җиткерергә тырышты. Ул безнең балалар өчен дә, олылар өчен дә — поэзиядә дә, прозада да каләменең көчен күрсәтте! Соңгы көненә кадәр язды. Әле аның басыласы бик күп әсәрләре калган, алар киләчәктә чыгуына ышанабыз», — диде ул.
Нәҗибә Сафинаның кызы Лилия ханым әнисенә карап һәрвакыт сокланып яшәвен әйтте.
«Әни үзенә карата белә иде халыкны. Мин аңа балачактан ук һәрвакыт сокландым. Дөньяның матурлыгын яратырга, яшәешне яратырга өйрәтте. Аның белән һәрчак кызык иде», — дип сөйләде ул «Татар-информ» хәбәрчесенә.
Нәҗибә Сафина белән хушлашырга аның якыннары, каләмдәшләре килгән иде.
Фото: Юлай Низаев архивыннан.
2021 елда Башкортстанда үткән Мәҗит Гафури көннәрдә.