Җөри авылында капиталь ремонттан соң мәдәният йорты ачылды
Яңа мәдәният йорты 200 кешегә исәпләнгән.
Скопировать ссылку
(Мамадыш, 14 июль, "Татар-информ", Ләйлә Хәкимова). Бүген Мамадыш районы Җөри авылында капиталь ремонттан соң мәдәният йорты ачылды. Биредә барлык төзү эшләре Республика мәдәният объектларын капиталь ремонтлау программасы нигезендә башкарылган.
- Яңа мәдәният йорты 200 кешегә исәпләнгән.
Тантаналы чарада Мамадыш район башлыгы Анатолий Иванов, Татарстан Премьер-министры Алексей Песошин катнашты.
Яңа бина Мамадышның ООО "Инвестрой" оешмасы көче белән торгызылган. Район башлыгы Анатолий Иванов республика җитәкчеләренә, әлеге объектны тиз арада төзеп файдалануга тапшырган төзүчеләргә рәхмәт сүзләрен әйтте. "Бүген Җөри авылы халкы өчен икеләтә бәйрәм. Беренчесе - Питрау булса, икенчесе - яңа мәдәният йорты үз ишекләрен ача. Призедентыбыз Рөстәм Миңнеханов һәм дәүләт программалары ярдәме белән авылда мәктәп, балалар бакчасы, чишмәләр төзекләндерелде. Урамнарыбызга асфальт юл салынды. Яңа мәдәният йорты озак хезмәт итсен, йөрүчеләр күп булсын", - диде ул.
"Авыл халкы тормышында мәдәният йорты бик мөһим роль уйный. Чөнки нәкъ менә әлеге бинада мәдәни чаралар уза, гореф-гадәтләр, милли йолалар саклана. Мәдәният йорты сәнгатькә битараф булмаган кешеләрне берләштерсен. Барчагызга да күңел күтәренкелеге, саулык-сәламәтлек телим", - диде үзенең чыгышында Алексей Песошин. Премьер-министр Җөри авылы мәдәният йорты җитәкчесе Надежда Карповнага бина өчен кирәкле товарлар сатып алуга (акчалата) сертификат та тапшырды.
Ачылу тантанасы зур бәйрәмгә әверелде. Авыл халкы үз көче белән әзерләгән концерт номерларын күрсәтте. "Элекке клуб бик кечкенә, уңайсыз, салкын иде. Яңа бина хөкүмәтебездән зур бүләк. Бездә авыл халкы бик актив. Нинди генә мәдәни чаралар узмасын, теләп катнашалар. Бию, җыр ансамбльләре бар. Олылар да, яшьләр бик озак көтте бу вакыйганы. Мәдәният учагы беркайчан да буш тормасын, биредә төрле мәдәни чаралар узсын", - диде Җөридә яшәүче Анна Капитонова.
