Режиссер Әминә Миндияр театр белгечлегенә укыр алдыннан абыстайдан фатиха алган
Дини уку йортларында белем алган кыз исламда театр тыелмаганмы дигән сорауга җавап эзләгән.
(Казан,19 ноябрь, “Татар-информ”). Режиссер Әминә Миндияр , Казан дәүләт мәдәният институтында Фәрит Бикчәнтәев курсында театр белгечлегенә укырга кергәндә үзенең рухи остазы Рәшидә абыстай Исхакыйдан фатиха алган. Ул театр исламда тыелмаганмы дигән сорауга ничек җавап эзләгәнен “Татар-информ” хәбәрчесенә интервьюсында әйтте.
Әминә Миндияр “Госмания” һәм “Мөхәммәдия” мәдрәсәләрендә укыган. Театр режиссеры булу теләге барлыкка килгәч, бу ике юнәлеш бер-берсенә туры киләме дип шикләнгән. Шул сәбәпле, Рәшидә абыстай Исхакыйга мөрәҗәгать иткән һәм уңай җавап алган.
“Рәшидә абыстай, бик күп кеше сүгә - театр һәм ислам, ни әйтерсез, фатихагызны бирерсезме, берәр киңәшме?” - дим. Ул: “Син укыганда һәм эшләгәндә намазыңны вакытында укый аласыңмы?” дип сорады. “Әйе, беркем киртә куймый. Намазымны вакытында укыйм”, дидем. “Алайса нигә сорыйсың?” - ди. Миңа аның фатыйхасы булды”, - ди режиссер.
Ул ни өчен нәкъ менә Рәшидә абыстайга да мөрәҗәгать итүен аңлатты. “Рәшидә абыстай Исхакый - безнең беренче мөфтинең (Госман Исхакый – ТИ) әнисе. Казанда, Татарстанда кемнең дә булса намаз укырга өйрәнергә теләге туса, бөтен кеше Рәшидә абыстайның намаз уку китабын тәкъдим итә. 12 битле китап, ләкин сөбханалла, зур китапларга тиң”, - дип аңлатты Әминә Миндияр.
Театр юнәлеше исламга каршы килмиме дигән сорауны ул Мәскәү Җәмигъ мәчетенең имамы Илдар Галәветдиновка да биргән. Имам: “Исламда тыелмаган әйбер рөхсәт ителгән”, - дип җавап биргән. “Театр ярамый”, дигән тыю юк, “Музыка ярамый”, дигән аерым хәдисләр юк. Театр ул, беренчедән, ликбез, икенчедән, йөрәкне чистарта торган төрле хис-тойгылар”, - ди режиссер.
Режиссер Әминә Миндияр белән интервьюның тулы вариантын “Интертат” сайтының "Шәһәрчеләр" рубрикасыннан укый аласыз.