Ренат Харис: Язучы әсәре – ул бөтен бер халык күңеле
Татарстан Язучылар берлегенең чираттан тыш корылтаенда Татарстан Язучылар берлегенең Россия Язучылар союзы белән берләшүе турында карар кабул ителде. Татарстанның халык шагыйре Ренат Харис берләшүгә карата үз фикерен белдерде.
«Россия язучылары татар әдәбиятына һәрвакыт яхшы карадылар. Яхшы язылганны яхшы тәрҗемә иттеләр һәм безнең әсәрләрне дөнья мәдәнияте казанышы иттеләр.
Язучы әсәре – ул бөтен бер халык күңеле. Мин тәрҗемәчеләремә рәхмәтле. Без Россия Язучылар берлегеннән аерылып яшәдек, без дөнья әдәбияты белән элемтәдән, дөнья цивилизациясеннән актив изоляциядә идек. Бу корылтай глобаль мәсьәләне хәл итә – татар әдәбиятын дөнья мәдәниятенә кайтара.
Чувашның «Күп тә бетә, аз да җитә, бергә булуга ни җитә!» дигән мәкале бар. Бергә булыйк!» – дигән ул.
Татарстан Язучылар берлегенең чираттан тыш корылтаенда яңгыраган фикерләрне «Интертат» сайты өчен Рузилә Мөхәммәтова язды.
