Мөселман яшьләре халык җырчысы Мингол Галиевне якын күргән

(Казан, 30 июнь, “Татар-информ”, Римма Гатина). Кичә Казанда Россия ислам университетында бөтенроссия мөселманнарының икенче фестивале тәмамланды. Анда катнашучылар Болгар шәһәрчегендәге эшчәнлекләре вакытында җыенга нәтиҗәләр ясаган.
“Татар-информ” мәгълүмат агентлыгы хәбәрчесенә Оренбургтан килгән Гөлдар Алимбәкова белдергәнчә, алдагы елларда фестиваль программасына Корьән уку буенча кызларга – аерым, егетләргә аерым дәресләр кертергә, Татарстанның халык җырчысы Миңгол Галиевнең тавыш көйләү буенча дәресләрен дәвам итәргә, Сабантуй кебек чараларны күбрәк уздырырга тәкъдим ителгән. Шулай ук кызлар арасында арасында җәмәгать намазын уку өчен җитәкче сайлап куярга һәм көндәлек газетаны чыгаруны дәвам итәргә кирәк дигән карарга киленгән.
Фестивальдә катнашучыларга бигрәк тә Татарстан казые Җәлил хәзрәт Фазлыев, Камаль хәзрәтнең вәгазьләре, Мингол Галиев дәресләре ошаган.
Берләшү, методик һәм гамәли ярдәм алу өчен җыенга килгән яшьләр белән сөйләшүләр вакытында алар фестивальнең алдагы елларда зур чара буларак узуын теләп калды.