Таҗикстан мәчетләрендә янәдән намаз укырга рөхсәт итәчәкләр

(Казан, 21 гыйнвар, «Татар-информ»). Таҗикстанда 18 апрельдән коронавирус инфекциясенә каршы көрәш буенча чаралар кысаларында ябылган мәчетләр 1 февральдән янә үз ишекләрен ача.

Бу хакта Төркиянең «Анадолу» агентлыгы хәбәр итә.

Республика оператив штабында шәхси һәм иҗтимагый гигиена кагыйдәләренең катгый үтәлергә тиешлеген, шулай ук Аллаһ йортларында медицина битлекләре кию мәҗбүри булуын искәрттеләр.

Йогышлы авыруларны кисәтү белән бәйле шәхси һәм иҗтимагый гигиена таләпләре үтәлмәгән мәчетләрнең эшчәнлеге тыелачак, диелә оператив штаб хәбәрендә.