Чирмешән мәчетендә балалар үзәге ачылды
Үзәктә бу атна шимбәсендә беренче дәресләр үтәчәк.
(Казан, 18 ноябрь, «Татар-информ», «Безнең Чирмешән», Кадыйр Гомәров). Чирмешән мәчетендә балалар үзәге ачылды. Бинадагы бер бүлмәне иганәчеләр ярдәме белән ремонтлап, дәресләр үткәрү өчен уңайлы шартлар булдырганнар. Түбә, стена, электр челтәрләре яңартылган, идәнне җылытыла торган иткәннәр, яңа палас җәйгәннәр. Бу хакта район газетасы хәбәр итә.
«Ремонт 160 мең сумга төште, шуның 70 меңен безгә исеме дә билгесез бер игелекле ир-ат бирде, аңа җиһазлар алдык. Гомумән, мәчеткә хәйрия акчалары җибәрүчеләргә, китерүчеләргә зур рәхмәт», — диде район мөхтәсибе Рамил Ибраһимов.
Мәчеттәге бу үзәккә элек Югары Чегодайда яшәгән, инде мәрхүм дин эшлеклесе Хәниф Вәлиев исемен биргәннәр.
Үзәктә бу атна шимбәсендә беренче дәресләр үтәчәк. Әлегә ике төркемдә егермеләп бала дин сабагы укыр, татар һәм гарәп телләрен өйрәнер, белгәннәрен камилләштерер дип көтелә. Моның өчен уку әсбаплары җитәрлек.