“Казан һәм мөселманнар” дигән фотокүргәзмәгә эшләр кабул итү дәвам итә

Күргәзмәгә фоторәссамнар, рәссамнар, дизайнерлар, шулай ук фотосөючеләр мөселман дөньясына багышланган эшләрен юллый ала

(Казан, 15 июнь, “Татар-информ”). “Info-Ислам” мәгълүмат агентлыгы редакциясе тарафыннан игълан ителгән “Казан һәм мөселманнар” дигән фотокүргәзмәгә эшләр кабул итү дәвам итә. Башкаланың мөселманнар дөньясын һәрьяклап яктыртуны максат итеп куйган әлеге чарага беркадәр эш кабул ителгән инде.
Билгеле булганча, башкаладагы мөселманнар дөньясы үзенчәлекле һәм кабатланмас мизгелләргә бай. Ягъни мөселман кафеларында, кибетләрдә, мәчет һәм мәдрәсләрдә алар белән бәйле кызыклы чаралар, вакыйгалар еш булып тора. Ләкин алар турында матбугатта аз языла, фоторәсемнәр дә, видеоматериаллар да аз. Чара исә әнә шул бушлыкны тулыландыруны күздә тота, диелә Ислам ру. сайтыннан алынган мәгълүматта.
Фотокүргәзмә “Info-Ислам” МА редакциясе, “Ярдәм” Ислам милли хәйрия фонды, ТР мөселманнары Диния нәзарәте һәм “Сөләйман” мәчете белән берлектә оештырыла.