Казанның Кабан арты мәчетендә балалар һәм үсмерләр өчен укулар узачак

(Казан, 13 июнь, «Татар-информ», Рәсилә Кәримова). 20 нче июньдә Казанның «Исламны кабул итүгә 1000 ел» исемендәге Кабан арты мәчетендә балалар һәм үсмерләр өчен укулар башлана. Ислам нигезләрен үзләштерүгә нигезләнгән һәм төрле кул эшләренә багышланган әлеге чара егерме көнгә исәпләнгән.

Балаларны һәм үсмерләрне дини әхлакка өндәү, аларны заман афәтләреннән саклауны максат итеп куйган мондый төр укулар әлеге мәчет тарафыннан ел саен үткәрелеп килә. Мәчет руханиларының балалар белән әлеге очрашуы соңгысы булмаячак. Мондый төр укуларны алар июль аена да планлаштыра. Ул исә 20 нче июльдә башланып китәчәк.

Мәчетнең имам-хатыйбы Исхак Лотфуллин әлеге укуларга балалар һәм үсмерләрдән тыш, өлкәннәр группасын да кабул итүләре турында әйтеп үтте. “Без бирегә килгән барлык кешеләрне дә кабул итәбез, аларны Ислам дине нигезләренә өйрәтергә без һәрвакыт әзер”, - дип белдерде ул.