Мөселманнар ураза тотуны дәвам итә

Шәүвәл аенда да ураза тоту мактаулы гамәлләрдән санала
(Казан, 7 октябрь, “Татар-информ”). Казанның 1000 еллык исемендәге югары мөселман мәдрәсәсе шәкертләре һәм мөгаллимнәре ифтар кылуны дәвам итә, дип белдерә ТР мөселманнары Диния нәзарәте матбугат хезмәте.
Билгеле булганча, Рамазаннан соң килүче Шәүвәл аенда да ураза тоту хакыкый мөселманнар өчен мактаулы гамәлләрдән санала. Бу хакта Пәйгамбәребез (с.г.в.) менә нәрсә дип белдергән: “Изге Рамазанда ай буе һәм аннан соң да 6 көн ураза тотучы, ел дәвамында ураза тотучыга тиң”.
Шәүвәл аенда ризыктан тыелып тору мәҗбүри саналмый. Ягъни 6 көн рәттән ураза тоту — катгый таләп түгел. Ә бәлки айның теләсә кайсы көнендә, үзенә уңайлы вакытта гына һәр мөселман ураза тота ала.
Шунысын да билгеләп үтәргә кирәк: шәүвәл ае 29 октябрь көнне кояш батканга кадәр дәвам итә.