Чувашиядә мөнәҗәтләр башкаручылар бәйгесе җиңүчеләре билгеле

Катнашучылар Коръән турындагы 48 сорауга җавап бирде.

(Казан, 6 май, «Татар-информ»). Татарстан Премьер-министры урынбасары, Татарстан Милли шура рәисе Васил Шәйхразиев Чувашия Республикасының Шыгырдан авылына сәфәрендә мөнәҗәтләр башкаручылар бәйгесендә җиңүчеләрне һәм лауреатларны бүләкләү тантанасында катнашты.

Бәйгедә Чувашия Республикасында яшәүче 6 яшьтән 18 яшькә кадәрге, балалар һәм яшьләр катнашты. Катнашучылар Коръән турындагы 48 сорауга җавап бирде, Рамазан ае турында мөнәҗәтләр башкарды, татар шагыйре Тукай шигырьләрен сөйләде. Бу турыда Бөтендөнья татар конгрессы матбугат хезмәте хәбәр итә.

«Мөслимә» мәчетендә Милли совет рәисе Васил Шәйхразиев балаларны җиңүләре белән котлады һәм уңышлар теләде.