Россия мөселманнарының Диния нәзарәте Җиңүнең 75 еллыгына эмблема тәкъдим итте

Рәссам-каллиграф Сергей Сорочьев Россия территориясендә борынгы заманнан бирле яшәүче халыкларның уртак дошманнарга каршы берләшү идеясен үз эшендә чагылдырган.

(Казан, 6 май, «Татар-информ»). Россия мөселманнарының Диния нәзарәте мөселман хәрбиләрнең һәм тыл хезмәтчәннәренең Бөек Ватан сугышында Җиңүгә керткән өлешен чагылдыра торган эмблеманы тәкъдим итте. Бу хакта Диния нәзарәтенең сайтында хәбәр ителә.

«Эмблема нигезендә «Әл-Гыймран («Гыймранның гаиләсе)» сүрәсеннән 169 аятьнең бер өлеше һәм «Иерихон башлыгы» буларак билгеле урта гасыр шлемы формасы алынган. Аятьнең тәрҗемәсе «Аллаһ юлында шәһит булганнар» дигәнне аңлата», диелә хәбәрдә.

Иерихон башлыгы — Россиядә урта гасырлар чорына караган билгеле хәрби артефактларының берсе. Риваять буенча, ул Александр Невскийныкы булган, аның тышкы дошманга каршы походларында славяннар һәм төркиләр көрәшкән.

Эмблеманың авторы — рәссам-каллиграф Сергей Сорочьев, ул хәзерге Россия территориясендә күптәннән яшәүче халыкларның уртак дошманнарга каршы берләшү идеясен чагылдырган.

Эмблема Җиңүнең 75 еллыгы гомумдәүләт символикасы белән визуаль рәвештә килештерелә.