Казанның «Зәңгәр» мәчетендә дин галимнәре кичке дәресләр бирә

(Казан, 5 октябрь, «Татар-информ»). Диния Нәзарәтнең голамәләре һәм шәригать белгечләре Казанның «Зәңгәр» мәчетендә кызыксынучылар өчен ислам буенча тирәнтен дәресләр бирә башлады. Кичке дәресләр көн саен уздырыла, керү — ирекле һәм бушлай.

Һәр якшәмбе көнендә мөселманнар Татарстан мөфтие Камил хәзрәт Сәмигуллин белән дә очраша ала. Ул Имам Раббаниның «Мактубат» хезмәте буенча дәрес бирә, дип хәбәр итә нәзарәтнең матбугат хезмәте.

Казанның «Зәңгәр» мәчете Сара Садыйкова урамы, 8/19 йорт адресы буенча урнашкан. Һәр дәрес якынча 1 сәгать дәвам итә.

Моннан тыш, Инстаграм социаль челтәрендә мәчетнең @zangar_masjid аккаунтында һәр дәреснең туры эфиры оештырыла.

Лекцияләр вакыты турында сылтама аша белергә мөмкин.

Белешмәләр өчен телефон: +88002227676 (эш көннәрендә 10:00–16:00); @AbuYahya_pro (телеграм).