Рамазан аенда Казанда БДБ илләрендә тиңе булмаган, күзләре күрмәүчеләр өчен белем бирү үзәген ачу көтелә

“Моның кебек үзәкләр бөтен БДБ территориясендә дә юк. Бу – Татарстан мөфтиятенең социаль ярдәм күрсәтү һәм рухи юнәлештәге проектларының берсе”, - диде мөфти

(Казан, 5 июль, “Татар-информ”, Римма Гатина). Рамазан аенда Казанда күзләре күрмәүчеләр өчен белем бирү үзәген ачу көтелә. Ул бөтенроссия күләмендә уникаль санала. Тернәкләндерү үзәге “Ярдәм” дип атала.

“Моның кебек үзәкләр бөтен БДБ территориясендә дә юк. Бу – Татарстан мөфтиятенең социаль ярдәм күрсәтү һәм рухи юнәлештәге проектларының берсе”, - диде бүген ТР мөселмаеннары Диния нәзарәтендә узган матбугат очрашуы вакытында мөфти Камил хәзрәт Сәмигуллин.

Анда сукырларны эшкә өйрәтү, Брайль буенча китаплар бастыру (моның өчен махсус техника сатып алыначак) көтелә.