Казанда татар халкының гореф-гадәтләренә нигезләнгән дини тамаша күрсәтеләчәк

Оештыручылар сүзләренчә, тамаша «Мәдрәсә — белем чишмәсе» дип аталса да, ул дин әһелләре, мәдрәсә шәкертләре өчен түгел, халык өчен куела.

Скопировать ссылку

(Казан, 5 апрель, «Татар-информ», Рифат Каюмов). 9 апрельдә «Сәйдәш» мәдәният үзәгендә «Мәдрәсә — белем чишмәсе» исемле театральләштерелгән концерт күрсәтеләчәк.

«Без эстрада җырчылары шикелле шәрә кызларны биетеп, дискотека ясый алмыйбыз. Яшьләрне аздыра торган җырлар да булмаячак. Бу татар халкының гореф-гадәтләренә, пәйгамбәребез хәдисләренә нигезләнгән проект», — диде дини җырлар башкаручы, «Мөнбәр» татар-дини театрын оештыручы Ильяс Халиков «Татар-информ» агентлыгында узган мәгълүмат конференциясендә.

Тамашага билетлар сатылып беткән диярлек. Ильяс Халиков аларның иртәгә калмаска да мөмкинлеген белдерде.

Апанай мәчете имам-хатыйбы Нияз хәзрәт Сабиров «Мәдрәсә — белем чишмәсе» тамашасында Ислам диненең матурлыгы, иманлы булып яшәүнең әһәмияте күрсәтеләчәген әйтте.

«Яшьләр дә, олылар да үзебезнең милли, дини гореф-гадәтләребезне оныталар һәм чит гадәтләргә ияреп яшиләр. Халкыбызга рухи һәм милли традицияләребезне җиткерү өчен без төрле ысулларны кулланырга тиеш. Коръәндә „Дингә хикмәт һәм матур үгет-нәсыйхәт белән чакырыгыз“ дип язылган. Шушы проектта тамашачылар динебезнең һәм милләтебезнең гореф-гадәтләре белән таныша», — диде Нияз хәзрәт Сабиров.

Оештыручылар сүзләренчә, тамаша «Мәдрәсә — белем чишмәсе» дип аталса да, ул дин әһелләре, мәдрәсә шәкертләре өчен түгел, халык өчен куела. Алар дин турындагы сүзләр сәхнәдән яңгыраса, халыкка үтемлерәк булып ирешер дип өметләнәләр.

Сәхифәләр

Казанда татар халкының гореф-гадәтләренә нигезләнгән дини тамаша күрсәтеләчәк