Начар күрүче мөселманнарның чираттагы укулары дәвам итә

Билгеле булганча, бу юлы анда 20 июньгә кадәр ир-егетләр белем ала

(Казан, 3 июнь, “Татар-информ”). Башкаланың “Сөләйман” мәчете каршында эшләп килүче начар күрүче һәм күрүдән мәхрүм калганнарның тернәкләндерү үзәгендә чираттагы укулар дәвам итә. Билгеле булганча, бу юлы анда Татарстанның шәһәр-районнарыннан һәм Башкортстаннан килгән 16 ир-ат Ислам нигезләрен үзләштерә һәм Л.Брайль системасы буенча Коръәнне өйрәнә.
Әйтергә кирәк, ай дәвамында әлеге курсларда белем үзләштергән динкардәшләребез биредән үзләре үк дини белем бирү ысулларын да өйрәнеп, шәһәрләрдә, районнарда, авылларда инвалидларга гыйлем тарата, укулар оештыра. Узган ел шушы курсларда Чечен Республикасыннан килеп белем алган мөселманнар ватаннарында шундый курслар оештыра инде, диелә Сулейман.ру сайтыннан алынган хәбәрдә.
Май аенда башланган ир-атлар төркеменең укулары 20 июньдә төгәлләнәчәк.
Шунысын да билгеләп үтәргә кирәк: биредә белем алучыларның яшәве һәм туклануы, юл чыгымнары өчен курсларны оештыручылар түли.