Камил Сәмигуллин Тәлгать Таҗетдингә “Кәлам Шәриф.Мәгънәви тәрҗемә” китабын бүләк итте

Мөселман башлыклары Ислам динен Идел буе Болгар дәүләтендә рәсми рәвештә кабул итүгә 1100 ел тулуга багышланган тантаналы чараларны оештыру турында фикер алыштылар.

(Казан, 3 март, «Татар-информ»). Бүген Татарстан Республикасы мөселманнары Диния нәзарәте резиденциясендә Россия мөселманнарының Үзәк Диния нәзарәте рәисе Тәлгать хәзрәт Таҗетдин булды. Мөфтияттә кунакны Татарстан мөфтие Камил хәзрәт Сәмигуллин каршы алды. Камил хәзрәт очрашу башында ук Тәлгать хәзрәткә Коръән елы кысаларында Татарстан мөфтияте тарафыннан татар телендә нәшер ителгән «Кәлам Шәриф. Мәгънәви тәрҗемә» китабын тапшырды. Бу хакта ТР Диния нәзарәте хәбәр итә.

Тәлгать хәзрәт Таҗетдин әлеге фундаменталь хезмәт белән танышты һәм тәрҗемәне камилләштерү буенча үз тәкъдимнәрен җиткерде.

Шулай ук Татарстан мөселманнары башлыгы очрашу истәлеге итеп кунакка нәзарәтнең «Хозур» нәшрияты тарафыннан басмага әзерләнгән татар дин белгече Мөхәммәд Морад Рәмзинең «Казан, Болгар һәм татар хакимнәре турында хәбәрләр, вакыйгалар, риваятьләр җыелмасы» репринт басмасының тәүге нөсхәсен бүләк итте. Әлеге китап Россиядә М.Рәмзинең иң танылган тарихи хезмәтләреннән санала.

Алга таба мөселман башлыклары берничә мөһим мәсьәлә, шул исәптән Ислам динен Идел буе Болгар дәүләтендә рәсми рәвештә кабул итүгә 1100 ел тулуга багышланган тантаналы чараларны оештыру турында фикер алыштылар, шулай ук бөек татар дин галиме Шиһабетдин Мәрҗанинең рухи мирасы, аның мөселман дөньясындагы һәм Россиядә Ислам үсешендә мөһим роле турында да сүз барды.

Дин әһелләре аерым Россия халыкларының туган телләрен саклау проблемаларына да тукталдылар.