Чаллы мотивацион «Максат» проекты үз эшен башлап җибәрде

Ә 1 мартта Сидоровка бистәсендә урнашкан «Ихлас» мәчетендә мөслимәләр җәмгыяте «Мин хидҗаб яратам» исемле чара оештырды.

(Казан, 3 март, «Татар-информ»). Яр Чаллыда яшьләр өчен берничә чара узды. Шәһәр мөхтәсибәте ярдәмендә татар мөселман яшьләре өчен үз-үзеңне камилләштерү дәресләре эшли башланды. «Максат» проектында оештыручылар яшьләрне тормышларын үз кулларына алырга өндәп, үз өстеңдә эшләү юлларын өйрәтәчәк, финанс һәм эшмәкәрлек турында белем бирәчәк. Бу хакта ТР Диния нәзарәтенең матбугат хезмәте хәбәр итә.

Беренче очрашу 27 февральдә «Нур-Ихлас» мәчетендә узды. Яшь мөселманнар проектның максаты белән таныштылар һәм «Мөселман кешесе нинди булырга тиеш?» дигән сорауга фикер алыштылар. Мәҗлес чәй өстәле артында тәмамланды.

Шулай ук 29 февральдә «ГЭС мәхәлләсе» мәчетендә әдәп һәм әхлак дәресләре башланды. Алга таба очрашу кысаларында гаилә дәресләре, семинарлар уздыру да күздә тотыла.

1 мартта Сидоровка бистәсендә урнашкан «Ихлас» мәчетендә мөслимәләр җәмгыяте «Мин хидҗаб яратам» исемле чара оештырды.

Кызлар яулык бәйләү ысуллары белән бүлеште, кулга мехенди ясау буенча мастер-класс узды. Яшь кызлар үзләренең тормышка мөнәсәбәтләре турында чыгыш ясадылар, кечкенә генә ярминкә дә эшләде.