Равил Сабырга Әлмәт төбәгендә татар әдәбиятын үстерү эше йөкләнергә мөмкин
Язучылар берлегенең Әлмәт бүлекчәсендә үзгәрешләр көтелә. Драматург һәм журналист Равил Сабырга Әлмәт төбәгендә татар әдәбиятын үстерү эше йөкләнергә мөмкин.
«Андый уйлар бар. Татарстанның Әлмәт, Азнакай, Бөгелмә, Лениногорск, кебек шәһәрләрен һәм берничә районын берләштергән төбәкнең иҗади потенциалы зур. Шул төбәктә әдәби тормышны җанланлырасы килә», – диде Татарстан язучылар берлеге рәисе Ркаил Зәйдулла.
Әлмәт районының Габдрахман авылында танылган шагыйрә Энҗе Мөэминова укулары булачак. Шул ук көнне Ркаил Зәйдулла катнашында Татарстан Язучылар берлегенең Әлмәт бүлекчәсенең утырышы көтелә. Үзгәрешләр шунда булырга мөмкин.
Ркаил Зәйдулла Әлмәт төбәгендә иҗади тормышны җанландыру мәсьәләләре буенча «Татнефть» белән дә сөйләшүләр баруын әйтте. Әгәр җитәкче алыштыру мәсьәләсе хәл ителсә, Равил Сабырның бу эшне киң колач белән алып бара алачагына ышаныч белдерде.
- Хәзерге вакытта Язучылар берлегенең Әлмәт бүлекчәсен язучы һәм журналист Рәфкать Шаһиев җитәкли.
- Равил Сабырга быел 50 яшь тулды. «Татнефть» акционерлык җәмгыятенең «Нефтяные вести» газетасының баш мөхәррире булып эшләде, соңрак «Татнефть»нең мәгълүмати сәясәт идарәсенең эчке багланышлар бүлеге җитәкчесе вазыйфасын башкарды. Ел башында эшеннән китүе билгеле булды
- Соңгы танылган һәм резонанс уяткан әсәрләренең берсе – «Фәхрине үтереп ташладылар» романы һәм әлеге әсәр буенча Әлмәт театрында куелган «Бер хыянәт тарихы» («Фәхрине үтереп ташладылар») киноспектакле.
- Быел Минзәлә театрында авторның «Син генә җитмәгән идең» комедиясе куелды.