Равил Гайнетдиннең әхлак нигезләренә багышланган китабы чыкты
Россия мөселманнарының рухи лидеры, мөфти шәех Равил Гайнетдиннең «Әхлак» дисциплинасы буенча тәкъдим ителгән уку әсбабы дөнья күрде. Ул шәехнең ислам диненә, мөселманнарга һәм барлык халыкка 35 ел остазлык итү һәм рухи хезмәт тәҗрибәсе нәтиҗәсе булып тора. Бу хакта Россия Мөфтиләр шурасы матбугат хезмәте хәбәр итә.
Китапны Россия Федерациясе мөселманнарының Диния нәзарәте, Мәскәү ислам институты һәм Санкт-Петербург дәүләт университетының Ислам тикшеренүләре үзәге катнашында «Мәдинә» басмаханәсе нәшер итекән.
«Россия мөселманнарының рухи лидеры китабы ислам дине күзлегеннән әдәп һәм әхлак нигезләренә багышланган. Анда кешегә Аллаһ белән, үзе һәм тирә-юньдәгеләр белән мөнәсәбәтләрдә ничек гармониягә ирешергә, дигән сорауга җавап бирүче һәм һәр заман өчен дә актуаль аспектлар яктыртылган. Китап дин тотучыларның күп кенә сорауларына җавап бирә», диелә хәбәрдә.